– Ishonchim komilki, bizni yorqin kelajak kutmoqda, chunki buning uchun barcha sharoitlar yaratilgan. Ammo ushbu kelajak har birimizga, yaxlit xalq boʻlib harakat qilishimizga bogʻliq, – deydi safdor Oʻktam Hamroyev. – Men Vatanim Oʻzbekiston ekanligidan faxrlanaman. Sobitqadamlik bilan olgʻa borayotgan ona yurtim muvaffaqiyatlaridan sevinaman. Biz, harbiy xizmatchilar zimmasiga katta masʼuliyat yuklangan. Mustaqillik yillarida davlatimiz erishgan yutuqlarni yosh avlod asrab-avaylashi, yanada koʻpaytirishi zarur. Har birimiz, istiqlol tengdoshlari Yangi Oʻzbekiston taraqqiyoti va gullab-yashnashiga salmoqli hissa qoʻshamiz.
– Men uchun mustaqillik, eng avvalo, oʻz yurti, xalqi, madaniyati, ilm-fan va adabiy yutuqlari bilan faxrlanish, iftixor tuygʻusidir. Odamlar hech boʻlmaganda bir marta bizning yurtimizga kelishga intilayotganidan xursandman, – deydi safdor Javohir Niyozaliyev. – Men uchun davlatni professional kadrlar – mamlakat manfaatlari uchun xizmat qiladigan insonlarning boshqarishi juda muhim. Toki Oʻzbekiston yoshlari oʻz taraqqiyot yoʻlini tanlash huquqiga ega boʻlsin.
– Mustaqil yurt bilan birga tugʻilganligim zimmamga muayyan masʼuliyat yuklaydi, – deydi kichik serjant Ortiqjon Imomov. – Men bolaligimdan suveren davlatimiz ravnaqiga hissa qoʻshish uchun harbiy xizmatchi boʻlishni orzu qilardim. Biz, mustaqillik tengdoshlari, el-yurt bilan birga ulgʻaydik, kamolot va kasbiy shakllanish yoʻlida dadil qadam tashlamoqdamiz.
Shuhratillo Azimov Oʻzbekiston Qurolli Kuchlari safida muddatli harbiy xizmatni oʻtab, shartnoma asosida xizmatni davom ettirishga qatʼiy qaror qildi. Kichik serjant
Sh. Azimov jangovar va xizmat tayyorgarligi aʼlochisi, yoshlarning jonkuyar murabbiyi.
– Mamlakatda uchinchi Uygʻonish davri poydevori qoʻyilib, Yangi Oʻzbekiston qurilishi davom etmoqda. Xalqimiz yuksak marralar sari dadil qadam tashlamoqda. Soʻnggi yillarda yurtimizning turli hududlarida qad rostlagan yirik inshootlar Oʻzbekistonning orzu-intilishlari naqadar buyuk, xalqimizning bunyodkorlik salohiyati naqadar yuksak ekanidan dalolat beradi, – deydi kichik serjant Shuxratillo Azimov.
– Mustaqillik tengdoshi ekanimdan, egnimga osoyishtalik posboni libosini kiyganimdan faxrlanaman, – deydi kichik serjant Nodirbek Hasanov. – Kelgusida soha rivoji uchun oʻz hissamni qoʻshib, xalqimiz tinchligi va osoyishtaligi yoʻlida yanada shijoat bilan xizmat qilishga vaʼda beraman.
Boris Kleyman.