TINISHLIQ QӘDIRI REFORMALAR UYGʻINLIGʻINDA
Hәmme zamanlarda da yel-jurt tinishligʻin saqlaӯ, qәӯipsizlikti tәmiyinleӯ, hәr bir insanniң өmiri, densaӯligʻi hәm mal-mүlkin tүrli qәӯip-qәterlerden isenimli qorgʻaӯ yeң әhmiyetli mәselelerden bolip kelgen. Mәmleketimiz basshisiniң baslamasi menen baslangʻan dәslepki reformalarda әyne puqaralardiң salamatligʻi hәm qәӯipsizligin tәmiyinleӯ taraӯlarinda baylanisli boldi. Bunda tiykargʻi itibar ishki isler organlarin xaliqqa өz ӯaqtinda hәm sipatli jәrdem kөrsetetugʻin, hәr bir xizmetkeri tәrepinen xaliq mәplerine xizmet yetiӯdi өz minneti dep biletugʻin sotsialliq bagʻdarlangʻan professional sistemagʻa aylandiriӯgʻa qaratildi. Ishki isler organlari basshilari tәrepinen puqaralar menen jaqsi mүnәsibette boliӯ, jinayatlardi mәhәllelerdiң өzinde dodalaӯ, yeң shetki aӯillargʻa barip xaliqtiң dәrtin tiңlaӯ әmeliyati jolgʻa qoyildi.
Reformalar nәtiyjesinde, birinshi nәӯbette, xaliq mәplerine xizmet yetetugʻin xaliqshil sistema jaratildi. Өzbekstan Respublikasi Prezidentiniң «Ishki isler organlarin xaliqshil professional taraӯgʻa aylandiriӯ hәm xaliq penen jәne de jaqin birge islesiӯge bagʻdarlaӯ boyinsha qosimsha is-ilajlar haqqinda» gʻi qarari bul bagʻdardagʻi jәne bir үlken qәdem boldi.
Qarar menen ishki isler organlarin xaliqtiң isenimli qorgʻaӯshisi sipatinda xaliqshil professional sistemagʻa aylandiriӯ, olardiң puqaralar, jәmiyetlik shөlkemleri hәm de keң jәmiyetshilik penen jaqin birge islesiӯde, өzara isenim hәm aӯizbirshilikte islesiӯin tәmiyinleӯ, mәhәlleler, xaliqtiң jasaӯ orinlari hәm pүtkil yelimizde nizam үstinligi, tinishliqti jәne de bekkemleӯ, bir sөz benen aytqanda, «insan qәdiri ushin» printsipiniң әmeliy turmista toliq өz sәӯleleniӯin tabiӯ maqsetin gөzleydi.
RUӮXIY TURAQLILIQ DAӮAMLI
Ishki isler organlari xizmetkerleriniң zamanagөy jүzin payda yetiӯ, olardiң juӯapkershiligi hәm kәsiplik sheberligin arttiriӯ boyinsha qatar unamli jumislar islendi. Tinishliq saqshilarin xizmet minnetlemesine sadiqliq, ӯatansүyiӯshilik, hadalliq ruhinda tәrbiyalaӯ, imidjini arttiriӯgʻa yerisiӯ ministrlik basshiligʻiniң turaqli diqqat itibarinda. Reformalar nәtiyjesinde xizmetkerlerdiң huqiq hәm ӯәkillikleri keңeydi, әyne payitta juӯapkershiligi de kөbeydi, olardi huqiqiy hәm sotsialliq jaqtan qorgʻaӯ tiykarlari jaratildi. Bүgingi kүnde ishki isler organlariniң jumisin jәne de jetilistiriӯ maqsetinde jeke quramdi juӯapkershiligine jүkletilgen ӯaziypalardi orinlaӯgʻa ilayiq, ruӯxiy jetik, fizikaliq jaqtan jetilisken, maman xizmetkerler menen toliqtiriӯ ilajlari kөrilmekte.
Ishki isler organlarinda hadal hәm pәk ӯaziypalardi өzi ushin turmislik qәdiriyat, joqari maqset dep biletugʻin ӯatandi sүyetugʻin xizmetkerler jүdә kөp. Әyne usinday xizmetkerler hәm olardiң pidәkerlik xizmetleri sebepli sistemada ruӯxiy turaqliliq daӯamli.
HӘMMESI INSAN QӘDIRI USHIN
Jinayatshiliqtiң jaңa kөrinislerine qarsi gүresiӯ ushin olarda zәrүr kөnlikpeler qәliplespekte. Taraӯdi toliq sanlastiriӯ bagʻdarinda әhmiyetli qәdemler qoyildi. Basqishpa-basqish ishki isler organlariniң tayanish punktleri negizinde mәhәlle huqiq qorgʻaӯ orinlari shөlkemlestirilmekte.
Mәhәllelerde jaratilgʻan sistema-«puqarabay», «shaңaraqbay» hәm «mәhәllebay» islesiӯ arqali huqiqbuzarliqlardiң sotsialliq profilaktikasin tәmiyinleӯ өz nәtiyjesin bermekte. Atap aytqanda, hәr bir mәhәlle, shaңaraq hәm shaxs kesiminde jinayatshiliqtiң sebeplerin aniqlaӯ hәm olardi saplastiriӯ әmeliyat yengizildi.
Jinayatshiliq halatinan kelip shigʻip, rayon, qala hәm mәhәlleler «qizil», «sari», «jasil» kategoriyalargʻa ajiratilip, juӯapkerler hәm jәmiyetshilik penen birgelikte «jinayat oshaqlari»n saplastiriӯ ushin bәrshe zәrүr kүsh hәm qurallarin tartiӯ arqali mәmleketimizde tinishliq hәm turaqliliqti tәmiyinleӯ ilajlari kөrilip atir.
XALIQQA XIZMET-JOQARI BAXIT
«Jaңa Өzbekstan ishki isler organlari» sistemasin jaratiӯ maqsetinde taraӯdi zamanagөy bilimli, joqari insaniy hәm professional qәbiletke iye bolgʻan jas kadrlar menen toliqtiriӯgʻa ayiriqsha itibar qaratiladi. Ishki isler organlarinda Jәmiyetshilik keңesleri mәmleket, puqaralar hәm puqaraliq jәmiyeti institutlari menen nәtiyjeli birge islesiӯdi jolgʻa qoygʻan halda, ishki isler organlari jumisin jәne de jedel hәm hәr tәrepleme raӯajlandiriӯgʻa qaratilgʻan hәreketler birlestirmekte. Bul dүzilme zamanagөy formadagʻi sistemali hәm nәtiyjeli mүnәsibetlerdi jolgʻa qoygʻan halda өzara sotsialliq mәpler kelisiӯin tәmiyinleydi.
Xaliq ishki isler organlari xizmetkerlerin tek gʻana professional hәm maman kәsip iyesi yemes, balki, mәmile әdebi hәm estetikasina iye shaxs sipatinda kөriӯdi qәleydi. Sotsialliq tarmaqlarda xizmetkerlerimizge qarata bildirilip atirgʻan unamsiz pikir hәm kritikalardiң kөpshilik bөlegi mәmile әdebi hәm estetikasina tiyisli boladi. Sonliqtan, bүgin ishki isler organlari xizmetkerine mәmile әdebi hәm estetikasin oqitiӯ-turmisliq talapqa aylandi.
Bir sөz benen aytqanda, tiykargʻi maqset-ishki isler organlarin xaliqshil sistemagʻa aylandiriӯ, taraӯda өz keleshegine jaңasha qaraytugʻin, Ӯatangʻa hәm xizmet minnetlemesine sadiqliq ruӯxinda tәrbiyalanip atirgʻan, yel-jurt xizmetine tayin, jүregi janip, kөzlerinen ot shaqnap turgʻan baslamashi hәm pidayi kadrlardi tayarlaӯdan ibarat.
Azizjan FAYZIYEV,
podpolkovnik.