Изҳори дил
Кўнгилда тозариш, янгиланиш бошланди. Хаёл кенгликларида парвоз қилаётган қалб заррин нурларини сочаётган қуёш, она замин бағридан бош кўтараётган майсалар, қушлар хонишию анҳорларда шилдираб оқаётган сувларнинг гўзаллигидан ҳайратда. Қаҳратоннинг қаҳри синди, ёруғ кунларга эсон-омон етиб олган момоларимиз ариқ бўйидаги ялпизларни кўзларига суртиб омонлиқ-сомонлиқ қилишадилар.
Машҳур адиб Габриэл Гарсиа Маркес “Вақт ўтмайди, у айланади” деганида табиатдаги ўзгармас қонуният – фасллар алмашишини назарда тутган бўлса ажаб эмас. Ҳаёт чархпалаги айланиб борар экан, биз дунёга яхши амалларни бажаргани келган бир сайёҳ кабидирмиз. Шунинг учун инсонлар бир-бирларига тоза ниятлар изҳор этади, яхшиликлар илинади, ўзидан эзгу ишлар қолдиришни ихтиёр этадилар.
Баҳорни орзиқиб кутмоқ шундандир, балки. Чунки у қалбларни уйғотади, кишига тоза туйғуларни ҳадя қилади, вужудга тетиклик бахш этади. Инсонда келажакка умид, ишонч пайдо қилади, юрагингизни ажиб орзуларга ошно этади. Фасли навбаҳорни набототу ҳайвонот олами ҳам интиқлик билан кутади, яхши кўради. Шунинг учун бу фаслда табиатдаги ҳар бир мавжудотнинг кўриниши, гўзаллиги, ифори, қўшиғи, товуши бошқача.
Ҳа, кўклам ана шундай тароватли, нафосатли, фароғатли фасл. Яқинлашиб келаётган баҳор айёмингиз муборак бўлсин, азизлар! Бошлаётган ишларингизга хайр-барака ёғилсин. Юзинчи ва яна ундан-да кўпроқ навбаҳорларга етиш насиб эцин...
Гулчеҳра БУВАМИРЗАЕВА.
Наманган вилояти.