Устоз юртимиз учун энг қийин ва таҳликали бўлган йилларда Ички ишлар вазири сифатида одил ва оқилона сиёсат олиб бордилар. Ташаббускорлик кўрсатиб, ислоҳотлар жараёнининг бошида турдилар.
Инсон умрининг мазмунини йиллар эмас, йўллар белгилайди. Йўлларки, эзгу мақсадларни, буюк орзуларни дилга тукканча отланилган йўллар. Йўлдошига, йўлдагиларга беминнат ёрдам қўллари чўзилган, уларнинг оғирини енгил қилинган йўллар. Одамларнинг тинч-осуда ва фаровон ҳаёт кечириши, эмин-эркин меҳнат қилиши, энг муҳими, уларнинг масъуд онлари кўпроқ бўлишини истаб чиқилган йўллар. Ва ушбу хайрли мақсадлар рўёби учун матонат ила босиб ўтилган йўллар...
Ярим асрки, ана шу йўлдан дадил одимлаб бораётган генерал-полковник Зокиржон Алматовнинг эзгу ишлари дилдан тилларга кўчади. Унинг мураккаб геосиёсий шароитда мамлакатимизда миллатлараро дўстлик ва ҳамжиҳатликни асраш, сарҳадлар дахлсизлигини сақлаш, яқин қўшни давлатлар билан дўстона муносабатларни янада яхшилаш, турли минтақа ва ҳудудларда хавф-хатар ҳукм сурган замонда ички ишлар органлари ходимларини огоҳлик, сергаклик ва ҳушёрликка, фидойиликка даъват этиб, мустақиллигимизни мустаҳкамлашга қўшган беқиёс ҳиссасини бутун халқимиз юксак қадрлайди.
Таваллуд айёмингиз муборак бўлсин, азиз Устоз! Биз каби шогирдларингиз бахтига доимо соғ-саломат бўлинг. Кўп йиллар ёшларни ватанга, касбга садоқат руҳида тарбиялаш каби эзгу амалларда бош-қош бўлиб юришингизни тилаймиз.
Бернора САДИКОВА,
полковник.