Ичкиликбозлик инсонни охир-оқибат халокатга етаклайдиган иллатдир. Энг ёмони, спиртли ичимлик ичган шахслар мастлик оқибатида оғир турдаги жиноятларга қўл уриши мумкин.
Фарғона вилояти Фурқат тумани Тўрғай қишлоғида ҳам ана шу иллат оқибатида оғир турдаги жиноят содир этилди.
Спиртлик ичимлик ичиб, ширакайф бўлган икки фуқаронинг жанжали шу даражага бориб етадики, ўз хатти-ҳаракатининг оқибатини англамай қолган улфатлардан бири ошхона пичоғи билан шеригига оғир тан жароҳати етказди. Натижада жабрланувчи шифохонада вафот этди.
Мазкур жиноят вилоят Ички ишлар бошқармаси бошлиғи, полковник Муҳиддин Жўраэв иштирокида жиноят содир бўлган маҳаллада муҳокама қилинди. Туман сектор раҳбарлари, маҳалла фаоллари ва кенг жамоатчилик вакиллари иштирок этган муҳокама жараёнида ичкиликбозликнинг салбий оқибатлари яна бир бор тилга олинди. Жиноятнинг юзага келишига шарт-шароит яратган омиллар таҳлил қилиниб, бепарволик ва лоқайдлик қораланди.
Маҳаллада фолият олиб бораётган бешлик аъзолари томонидан “фуқаробай”, “хонадонбай” ўрганишларни мунтазам олиб бориш, ичкиликка ружу қўйган, доимий нозолашиб юрган, жиноят содир қилишга мойил шахсларни ўз вақтида аниқлаб, таъсир чораларини кўриш, уларни тўғри йўлга чақириш кераклиги қайд этилди.
Тадбирда маҳалла фаолларининг фикр-мулоҳазалари, жиноятчиликнинг барвақт олдини олиш юзасидан билдирган таклифлари ҳам эшитилди.
Абдувосит СИДИҚОВ,
“Постда” мухбири.
Фарғона вилояти.