Таҳлиллар шуни кўрсатмоқ­даки, ҳайдовчи ва пиёдаларда ҳаракатланиш маданиятининг йўқлиги ҳам катта-кичик «пробка»ларни келтириб чиқармоқда. Тирбандликларда ҳаракатланаётган автомашиналарнинг аксариятини «Дамас» ёки йўналишдаги бошқа транспорт воситалари ташкил этяпти. Йўловчи машиналарнинг кўплиги эса жамоат транспортининг эркин ҳаракатланишига халақит қил­моқда. Шу сабабли ҳамкор ташкилотлар билан йўллардаги тирбандликларга чек қўйиш мақсадида муайян ишларни олиб боряпмиз. Жумладан, йўл-транспорт ҳодисаларининг олдини олиш, ҳаракат иштирокчиларига қулай шароит яратиш мақсадида янги йўл белгилари, светофорлар ўрнатиляпти, янги пиёдалар ўтиш жойлари ташкил этилмоқда. Ҳайдовчи ва пиёдаларнинг йўлларда ҳаракатланиш маданиятини оширишга қаратилган тарғибот тадбирларини ўтказиш ҳам доимий эътиборимизда. 

Йўлларда тирбандликларнинг олдини олиш, ҳайдовчиларга қулайлик яратиш мақ­садида вилоят ИИБ ЙҲХБ томонидан вилоят ҳокимлигига қатор таклифлар киритилди. Чунончи, Наманган шаҳрининг «Қўқон» ва «Ғалча» кўчалари кесишмаси ўрнида айланма ҳаракатни жорий этиш таклифи илгари сурилди. Қолаверса, шу каби айланма йўлларни «Уйчи», Машраб, Навоий кўчаларида ҳамда «Марғилон» ва Навоий кўчалари кесишган чорраҳалар ўрнида ҳам ташкил этишни кўзда тутганмиз. Қолаверса, Тўрақўрғон тумани ҳудудидан ўтган 

4Р-120 автомобил йўли кесишган чорраҳа ўрнида айланма ҳаракат йўлини бунёд этиш тирбандлик муаммосига ечим бўлиши мумкин. 

Ҳар қандай муаммонинг ечими бор. Умид қиламизки, юқоридаги каби таклифларда кўзда тутилган ишлар амали­ётга татбиқ қилинса, йўллар­даги тирбандликлар, қоидабузарлик ҳолатлари бартараф этилишига эришилади. 

Ботиржон БОЙМИРЗАЕВ,

маёр.

Наманган вилояти.