Урганч шаҳрида яшовчи Қ. Ўткир (воқеа иштирокчиларининг исмлари ўзгартирилган) бели оғримасдан бойлик орттиришни ўзига касб қилиб олган кимсалардан бири. У анчадан бери ўйлаб юрган “режа”сини амалга ошириш учун бир неча кун бош қотирди. Шундан сўнг, таксичи қиёфасига кириб, ўзининг жиноий фаолиятини бошлади.
Урганчлик Г. Санъатнинг енгил автомашиналарини ижарага бермоқчи эканлигини эшитган Ўткир дарҳол унинг уйига боради. Автомобилларнинг харидори ўз оёғи билан келганидан хурсанд бўлган хонадон соҳиби уни ичкарига таклиф қилади. Машиналарни кўздан кечирган Ўткир унинг эгаси билан келишиб, шартларига рози бўлади.
Иши ўнгидан келган фирибгар Санъатнинг бир эмас, 4 та автомашинасини олиб кетади. Орадан бир неча кун ўтгач, ушбу машиналарни бозорга олиб бориб, 4 нафар фуқарога 468 миллион сўмга сотиб юборади ва ҳеч нима бўлмагандек юраверади.
Ижара ҳақини ололмаган Санъат автомашиналаридан ҳам айрилганини билиб қолади. У бир неча ой фирибгарнинг инсофга келишини кутади. Аммо, ҳаром луқма ейишга одатланган Ўткир ҳар куни турли баҳоналарни рўкач қилиб, жабрдийдани алдаб юраверади. Тоқати тоқ бўлган жабрланувчи охири ички ишлар органларига мурожаат қилишга мажбур бўлади.
Ҳозирда мазкур ҳолат юзасидан жиноят иши қўзғатилиб, тергов ҳаракатлари олиб борилмоқда.
Худойберган ЖАББОРОВ,
“Постда” мухбири.