Саноқли кунлардан сўнг юртимизнинг барча ҳудудларида энг улуғ, энг азиз байрамимиз Мустақиллигимизнинг 30 йиллиги кенг нишонланади. Шу муносабат билан ИИВ Марказий аппарати шахсий таркиби ўртасида саф кўриги ўтказилди.
Вазирлик саф майдонида бўлиб ўтган ушбу тадбирда ходимларнинг хизмат кийимини ўрнатилган тартибга риоя этган ҳолда кийиб юриши ҳамда уларнинг ташқи кўринишига алоҳида эътибор қаратилди.
Тадбирда сўзга чиққан Ички ишлар вазири ўринбосари, генерал-маёр Азизбек Икрамов халқимиз томонидан катта тантана қилинадиган истиқлол айёмига бағишланган оммавий тадбирлар юртимизнинг барча ҳудудларида уюштирилаётгани, унга тайёргарлик кўриш чоғида эса осойишталик посбонлари томонидан хизмат интизоми ва қонунийликка қатъий риоя этиши таъкидланди.
Шунингдек, вазир ўринбосари, ходимларнинг фуқаролар билан хушмуомалада бўлиши, одоб-ахлоқ қоидаларига амал қилиши ҳамда ҳушёрлик ва касбий тайёргарликни янада ошириш борасидаги муҳим вазифаларга ҳам батафсил тўхталди.
Шундай қилиб, ватанпарварлик руҳида ўтказилган мазкур тадбир якунида ИИВ шахсий таркиби оркестр садолари остида шахдам қадамлар билан саф майдонидан ўтишди.
Умид НУРУЛЛАЭВ,
подполковник.