Ўзбек тили байрами ҳамда 25-октабр – Ички ишлар органлари ходимлари куни муносабати билан ИИВ Жиззах академик лисейида “Заковат” интеллектуал ўйини уюштирилди. “Янги Ўзбекистон – янги ички ишлар органлари” шиори остида ўтказилган тадбирда “Билимдонлар” ва “Зукколар” жамоалари куч синашди.
Бу жараёнда ўқувчиларининг ўзбек тили тарихи ва тараққиёти, унинг ривожига ҳисса қўшган адиблар, шоирлар ва адабиёцҳуносларнинг ҳаёти ва ижодига оид билими синовдан ўтказилди. Шунингдек, “Ўзбекистон Республикасининг давлат тили ҳақида”ги қонуннинг мазмун-моҳиятидан ёшлар қанчалик хабардор эканликлари аниқланди. Интеллектуал ўйинда “Билимдонлар” жамоаси ғолиб бўлди.
Бундан ташқари, лисей ўқувчилари иштирокида “Тил билимдонлари” викторинаси ташкил этилди. Бу тадбир ҳам ёшларнинг ўзбек тили ва адабиётига оид билимини намойиш этиш учун хизмат қилди.
Алижон АБДУСАТТОРОВ,
“Постда” мухбири.
Жиззах вилояти.