Мана бугун тезкор вакиллар билан А-373 автомагист­ралининг «Шодлик» маҳалласидан ўтган жойига етиб келди. Маълум бўлишича, «Дамас» русумли автомаши­на ҳайдовчиси бошқарувни йўқотиб, йўл четида тўхтаб турган «Исузу» юк машинасининг орқа томонига катта тезликда келиб урилган. Натижада «Дамас» ичидаги беш нафар йўловчидан тўрттаси ҳаётдан кўз юмган. Капитан ҳолатни ўрганар экан, суд-автотехник, суд-тиббий экс­пертиза тайинлади. Автомашинанинг тормозла­ниш масофаси, техник ҳолати ўрганиб чиқила бошланди. Ўрганишлар «Дамас» автомобили белгиланган тезликдан ошиқроқ тарзда ҳаракатлангани, унинг техник ҳолати яхши бўлганини кўрсатди. Демак, ҳайдовчи ухлаб қолган ёки соғлиғида тўсатдан муаммо пайдо бўлган. Ўрганишлар, ўлчашлар, ҳисоблашлар тугаганида, вақт ярим тунга бориб қолганди. 

Эртаси куни шу иш бўйича тергов ҳаракатларини давом эттирди. «Исузу» автомбили ҳайдовчисининг кўрсатмасини олди. Унинг айтишича, йўл четига дам олиш учун тўхтаган. Бу жойда тўхташ тақиқланмаган. Орадан ярим соат ўтгач, орқа тарафдан берилган кучли зарбадан машина турган жойидан икки метрлар четга сурилиб кетган. Ҳайдовчи шу заҳоти пастга тушиб, «Дамас» машинасининг орқа томонига яримигача кириб кетганини кўрган. Юк машинаси орқа томондан пачақланган, чап ёнбоши яроқсиз ҳолга келган. 

Капитан шундан кейин касалхонага йўл олди. «Дамас»да бўлган бешин­чи йўловчи ўзига келганди. Оёқларига жиддий шикаст етган ўттиз беш ёшлар­даги ушбу эркакнинг гапларидан воқеа ойдинлашди. Оила аъзолари Тошкентдан қайтаётган бўлган. Улар куни билан «Ипподром» бозорида харид қилишган. Кечга яқин ортга қайтишган. Барчаси чарчашган. Ҳайдовчи чарчоқдан кўзи илинган бўлиши мумкин. Шу тариқа терговчининг ушбу ҳолатга оид далилларни тўплаш, ҳуқуқий жиҳатдан асослашга оид асосий ишлари бажарилди. Энди суд-тиббий, суд техник хулосаларни кутиш қолганди.

Ушбу ҳолатга оид суриштирувлар тугамай яна бир жиноий ҳолатга оид хабар келиб тушди. Асадилло топшириққа асосан туманнинг «Андижон» маҳалласига етиб борди. Маълум бўлишича, ушбу маҳаллада яшовчи 42 ёшли фуқаро ўз уйида каннабис ўсимлигини етиштирган. Атайин ҳовлидаги маккажўхори экинининг орасига экилган олти туп каннабис ўсимлиги далилий ашё сифатида олинди. 42 ёшли фуқаро ушбу ўсимликларни шахсий истеъмоли учун етиштирганини тан олди. Ҳолат юзасидан барча ҳужжатлар расмийлаштирилиб, ўсимликлар экспертизага юборилди. Экспертиза натижаларига кўра ушбу ўсимликлар таркибида тетраканна­бинол гиёҳвандлик моддаси борлиги исботланди. 

Капитан Асадилло Ибрагимов қонун усутворлигини ва жиноятга жазо муқаррарлигини таъминлаш йўлида куч-ғайратини аямайдиган, бор билим ва маҳоратини ишга соладиган, фидойи ходим сифатида ҳамкасблари орасида катта ҳурмат қозонган. 

Абдураҳмон МУСТАФОҚУЛОВ,

ўз мухбиримиз.

Сирдарё вилояти.