У 1949-йил 30-мартда Қорақалпоғистон Республикасининг Беруний шаҳрида маориф фидойилари — Раҳмонберди Каримов ҳамда Раҳима Алимовалар оиласида туғилган. Зиёли оилада ўсган, болалигидан илмга чанқоқ бўлган қаҳрамонимиз Тошкент шаҳридаги 42-сонли ўрта мактабда ўқиб юрган кезларидаёқ, ўз олдига катта мақсадларни қўйганди.
Таълим даргоҳини кумуш медал билан тугатгач, Тошкент давлат университетининг физика факултетини имтиёзли диплом билан тамомлайди. Москва давлат университетининг Дубна шаҳридаги ядро физикаси факултетида дипломолди амалиётини ўтаркан, унинг кўнглида янги мақсадлар пайдо бўлади. 1971–1974-йилларда Ўзфа Ядро физикаси институти аспиранти бўлган лавҳамиз қаҳрамони 1975–1980-йилларда Екатеринбург шаҳридаги Урал университетининг фалсафа факултетида сиртдан ўқиган.
Меҳнат фаолиятини Ўзфа Ядро физикаси институти кичик илмий ходими сифатида бошлаган Бахтиёр Каримов илмий ходим, катта илмий ходим, бўлим бошлиғи лавозимларида ишлади. 1994–1996-йилларда Ўзфа Илмий ўқув марказининг директор ўринбосари лавозимида ишлаган
Б. Каримов 1996–2001-йилларда ИИВ Академиясининг фалсафа кафедраси мудири, илмий-тадқиқот бўлими бошлиғи, Ўзбекистонда демократик жамият қуриш назарияси ва амалиёти кафедраси мудири сифатида фаолият юритди. Ибратли ишлари ҳамда изланишдан тўхтамаслиги билан кўпчиликка намуна бўла олган таниқли олим Ўзбекистон Республикаси Президенти ҳузуридаги Стратегик ва минтақалараро тадқиқотлар институти бўлим бошлиғи ҳам бўлган. Бундан ташқари, Вазирлар Маҳкамаси ҳузуридаги Миллатлараро муносабатлар ва хорижий мамлакатлар билан дўстлик алоқалари қўмитасидаги масъулиятли вазифаларда унга ишонч билдирилган.
Б. Каримов ҳамон илм олишдан тўхтамайди. У 2020-йилда Ўзбекистон миллий университетининг хорижий филология факултетини муваффақиятли тугатган. 2022-йилда Москва халқаро академияси тилшунослик ва педагогика факултети магистратурасини битириб, 2023-йилда Москвадаги Синергия университетига «Сунъий интеллект» ихтисослиги бўйича ўқишга кирди. Ушбу мисолларнинг ўзиёқ биз ҳикоя қилаётган инсоннинг қанчалар илмга ошнолигини кўрсатади.
«Дадажонимиз жуда талабчан. Ёш авлодга ҳар томонлама намуна қилиб кўрсацак арзийди. Қўлларидан ҳалигача китоб тушмайди. Бир сўз билан айтганда, оилапарвар, меҳрибон инсон ва ҳақиқий илм фидойиси. Бизни, невараларини зиё олишдан тўхтамасликка мунтазам чорлаб келади!» – дейди бир неча йил ички ишлар органларида эркин ёлланган ходим сифатида ишлаган келини Шаҳноза Каримова.
Б.Каримов жамиятимизга кўплаб малакали шогирдлар етказиб берди. Фарзандлари ҳам отасига муносиб бўлиш ниятида фақат олдинга интилган.
У турмуш ўртоғи Мухтабар ая билан тўрт ўғил, бир қизни вояга етказган. Учинчи ўғли Ойбек Каримов ички ишлар органларида хизмат қилиб, Учтепа тумани ИИБ бошлиғи ўринбосари лавозимидан подполковник унвонида пенсияга чиққан. Ҳозирда тадбиркорлик билан шуғулланади. Қизи Умидахон илмий ишлар билан машғул бўлса, қолган фарзандлари тадбиркорлик йўналишидан кетишган.
Ўн етти невара, икки нафар эваранинг бобожониси, мўтабар 75 ёшни қаршилаш арафасида турган таниқли ўзбек олими Бахтиёр Каримов ҳозирда Ўзфа Шарқшунослик институтининг етакчи илмий ходими сифатида фаолиятини давом эттирмоқда.
Ҳа, илмнинг фазилати буюк бўлиб, инсон ҳаётида жуда аҳамиятлидир. «Илм инсонни улуғлайди!» деган нақл бежиз айтилмаганлигига Бахтиёр Каримов сингари етук олимларимизнинг ибратли ҳаёти далил бўлса, ажаб эмас.
Аброр ПОЁНОВ,
ўз мухбиримиз.