Кузатув
Узоқ йиллар давомида юртимиз тинчлик-осойишталиги йўлида хизмат қилиб, ёруғ юз билан пенсияга чиқиш ҳар бир она Ватан посбонининг бир умрлик орзусидир. Бугун ИИВ Тиббиёт бошқармаси тиббий назорат ва текширув гуруҳи етакчи мутахассис-шифокор-фармасевти, подполковник Расулжон Абдуллаев ҳам ана шундай иззат-икром билан нафақага кузатилди.
Тадбирда вазирлик тиббиёт бошқармаси бошлиғи, подполковник Шуҳрат Нишанов сўзга чиқиб, Р. Абдуллаевнинг ғайрат-шижоат билан фаолият юритган йилларига бир назар ташлади.
У Тошкент фармасевтика институтини тамомлаганидан сўнг, ИИВ Тиббиёт бошқармаси Наманган шаҳридаги Республика физиотерапия касалхонасининг дорихона бошлиғи-провизор лавозимида фаолиятини бошлайди. Кейинчалик, соҳадаги билим ва тажрибасини янада бойитган бу инсон раҳбарият томонидан ИИВ Тиббиёт бошқармаси тиббий таъминот бўлими катта мутахассис-шифокори этиб тайинланди. Шундан сўнг, мазкур бошқарманинг турли раҳбарлик лавозимларида фидойилик билан хизмат кўрсатиб, ўзини ҳар жиҳатдан ижобий намоён этган Расулжон Абдуллаев 2018 йилдан то ҳозирга қадар эгаллаб турган лавозимида фаолият юритди.
Шунингдек тадбирда ходимнинг ҳамкасблари ва шогирдлари ҳам ўзларининг самимий тилакларини билдириб ўтишди. Анъанага кўра, Р. Абдуллаевга тўн кийдирилиб, эсдалик совғалари топширилди.
Михли САФАРОВ,
ўз мухбиримиз.