Бухоро шаҳридаги Ёшлар марказида “Намунали маҳалла ҳуқуқ-тартибот масканлари” кўрик-танловининг вилоят босқичи ғолибларини тақдирлаш маросими бўлиб ўтди. Тадбирда маҳаллаларда тинчлик ва осойишталикни сақлаб, аҳолининг оғирини енгил қилаётган, мавжуд муаммоларни бартараф этаётган, жиноятчилик ва ҳуқуқбузарликнинг олдини олишда юқори кўрсаткичларга эришаётган учта намунали маҳалла ҳуқуқ-тартибот масканининг номи эълон қилинди.
Ҳакамлар ҳайъатининг хулосаларига кўра, Бухоро тумани “Работиқалмоқ” МФЙ профилактика инспектори, капитан Шаҳобиддин Исмоилов биринчи ўринни эгаллаб, нуфузли танловнинг республика босқичида вилоятимиз шаънини ҳимоя қилиш ҳуқуқини қўлга киритди.
Танловда иккинчи ўрин Вобкент туманидаги “Чармгарон” МФЙ профилактика инспектори, капитан Жаҳонгир Артиковга насиб этди. Фахрли учинчи ўринга Ғиждувон тумани “Пахтаобод” МФЙ ҳуқуқ-тартибот маскани профилактика инспектори, катта лейтенант Жамол Шодиэв лойиқ кўрилди. Бундан ташқари, танловда ҳуқуқ-тартибот масканларида энг фаол иш олиб борган ходимлар ҳам турли номинасиялар бўйича ташкилотчилар томонидан муносиб тақдирланди.
Тадбир вилоятимиз санъат усталарининг консерт дастури билан якунланди.
Ш.ЖАЛОЛОВ,
подполковник.
М.АҲАДОВ,
ўз мухбиримиз.
Бухоро вилояти.