Жорий йилнинг июн ойида профилактика инспектори, лейтенант Равшанбек Аминов Нукус шаҳрида ўзига бириктирилган макон фуқаролар йиғини ҳудудини айланишга чиққан эди. Тунги алламаҳал бўлишига қарамасдан кўчалардан бирида ҳаракатланиб келаётган «Дамас» автомашинасига кўзи тушади. Транспорт воситасининг давлат рақамига қараб унинг ҳудуддаги фуқароларга тегишли эмаслигини англаб етган профилактика инспектори автоуловни текшириб кўришга қарор қилади.

Автомашина салонини кўздан кечириш давомида 14 дона елим идишларда бўлган жами 700 литрга яқин соляркага ўх­шаш суюқ маҳсулот борлиги маълум бўлади. Ушбу маҳсулот­га тегишли ҳужжатлар сўралганида эса, ҳайдовчи ҳеч қандай ҳужжат тақдим эта олмайди.

Инспектор ушбу ҳолат юзасидан тегишли ҳужжатларни расмийлаштириб, автотранспорт воситасини жарима майдончасига жойлаштиради. Мазкур жараённинг ўзидаёқ ҳайдовчи профилактика инспекторига ишни «босди-босди» қилиш учун пул таклиф қилишни бошлайди. Лейтенант Р. Аминов унинг таклифи қонунга зид эканлиги, бунинг учун қонуний жазо тайинланиши ҳақида огоҳлантиради.

Аммо бу гаплар фуқарога унчалик таъсир қилмаган кўринади. Эртасига у яна ҳалиги «илтимос»ини такрорлаб, пул таклиф қила бошлайди. 

Ўтказилган тезкор тадбир давомида, қонунбузар фуқаро профилактика инспекторига 2 млн сўм миқдоридаги пулларни пора тариқасида бераётган пайтда ашёвий далил билан қўлга олинади. Мазкур ҳолат тегишли тартибда расмийлаштирилиб, унга нисбатан яна бир жиноят иши очилади ва суд томонидан тегишли жазо чораси тайинланади.

Азамат ПИРНИЯЗОВ, 

ўз мухбиримиз.

Қорақалпоғистон Республикаси.