Маст ҳолатдаги С.Саматнинг (исм-фамилия ўзгартирилган) қўнғироқ қилиб, такси чақиртиришдан мақсади уйига тезроқ етиб олиш эди. Аммо, чақиртирилган такси етиб келганидан сўнг унга чиққан Самат йўл-йўлакай турли сўзларни айтиб ҳайдовчининг жиғига тегди. Охири ҳайдовчининг сабри тугади. Ўртада гап талаш бошланди. Ҳайдовчи маст киши билан тортишиб ўтиришни ўзига эп кўрмай 102 қисқа рақамига қўнғироқ қилиш учун автомашинасини тўхтатди.
Автомашинадан тушиб телефонда гаплашаётган ҳайдовчи бироз ўтиб, орқасида турган “Спарк” автомашинасининг жойидан қўзғалганини кўриб, ҳуши учди ва бу ҳақида ички ишлар органига хабар бергунча жойида қолишга мажбур бўлди.
Бу пайтда калитнинг ичкарида қолдирилганидан фойдаланиб автомашинани юргизган Самат катта тезликда уни бошқариб кетаётган эди. Аммо, у узоққа бора олмади. Тезда қўлга олинди.
Эндиликда у ўзбошимчалик билан қилган хатти-ҳаракати учун бошқа манзилга элтиб қўйиладиган бўлди.
Азамат ПИРНИЯЗОВ
«На посту» мухбири.
Қорақалпоғистон Республикаси.