Urganch shahrida xizmat
vazifasini oʻtayotgan viloyat IIB JTSB PPX bataloni 2-otryad haydovchi xodimi,
safdor Davlat Abdullayev avtomobillar serqatnov yoʻlni kesib oʻtayotgan yoshgina
bolaga koʻzi tushdi. U darhol xizmat avtomashinasini toʻxtatib, bolakayni yoʻl
chekkasiga olib chiqdi. Oʻzini Dilmurod deb tanishtirgan bola oilasiga taalluqli
biror bir maʼlumot ayta olmadi. Shundan soʻng safdor D. Abdullayev hudud
profilaktika inspektoriga qoʻngʻiroq qilib, bolani ichki ishlar organlari tayanch
punktiga olib bordi.
Oradan koʻp oʻtmay «102»
navbatchilik xizmatidan shahardagi Baynalmilalchi koʻchasida Dilmurod ismli ikki
yashar bola otasi tomonidan qidirilayotgani haqida tezkor xabar olindi. Safdor
Davlat Abdullayev ushbu maʼlumot boʻyicha darhol bolaning otasi bilan bogʻlanib,
bolakay sogʻ-salomat ekanligini aytdi va unga tayanch punkti manzilini berdi.
Farzandidan xavotirlangan ota bir zumda manzilga yetib keldi va oʻgʻlini bagʻriga
bosdi.
– Oʻgʻlimni avtomashinada qoldirib,
sugʻurta agentligiga kirib ketdim, – deydi urganchlik Karimboy Elmuradov. –
Oradan 5–6 daqiqa oʻtgach chiqsam, oʻgʻlim mashinada yoʻq. Darhol uni izlashga tushdim.
Chorrahaga tutash koʻchalarni, yon-atrofdagi doʻkon va kafelarni aylanib chiqdim. Ammo
uni hech qayerdan topolmay, «102» raqamiga qoʻngʻiroq qildim. Xullas,
eʼtiborsizligim tufayli shunday voqea sodir boʻldi. Boringizga shukur, sizlardan
juda minnatdorman. Siz tufayli farzandim sogʻ-omon bagʻrimizga qaytdi.
Xudoybergan JABBOROV,
«Postda» muxbiri.
Xorazm viloyati.