9 май – Хотира ва қадрлаш куни

Иккинчи жаҳон уруши қатнашчиси, ички ишлар органлари фахрийси, истеъфодаги маёр Мирзааҳмад Сулаймонов навқирон ёшлик йилларини уруш ўчоғида ўтказган.

– Ҳар сафар жангга кираётганимда, юртимга, ота-онамнинг бағрига эсон-омон борай, дея дуо қилардим, – деди Мирзааҳмад ота. – Уруш ҳал қилувчи босқичга яқинлашиб борарди. Қочаётган душман қаттиқ қаршилик қиларди. Бир пайт каскамни тешиб, бошимга ўқ тегди. Яхшиямки, суякка ўтмаган экан. Ўн икки кун госпиталда даволаниб, яна жангга кирдим.

Тирик афсонага айланган отахоннинг бу каби ҳикояларини ёшлар катта қизиқиш ва ҳайрат билан тинглайди. Мирзааҳмад ота урушнинг суронли йилларини хотирлаш билан бирга, ёшларни бугунги тинч ва осуда замонга шукрона келтириб, ҳалол меҳнат қилишга, Ватанни севишга, илм олишга чақиради.

Мирзааҳмад Сулаймонов урушдан сўнг Риштон тумани Ички ишлар бўлимига хизматга кириб, 30 йилга яқин турли лавозимларда фаолият кўрсатди. Туман ИИБ ҳузуридаги Қўриқлаш бўлинмаси бошлиғи лавозимидан маёр унвонида пенсияга чиқди. Бугун у фарзандлари, набира ва чеваралари қуршовида кексалик гаштини сураяпти.

– Ёшлигимни эсласам, кўзларимга ёш келади, – дейди отахон. – Шукур, бугун тинч замонда яшаяпмиз. Кексаларга эътибор ва ғамхўрлик кўрсатаётган Президентимиздан, вазирлик раҳбариятидан доим миннатдорман.

Яқинда туман ИИБ бошлиғи ўринбосари, подполковник Бурхонжон Мамажонов ҳамда туман ИИБ Фахрийлар кенгаши раиси, истеъфодаги маёр Эминжон Обидов юз билан юзлашаётган нуронийни йўқлаб боришди.

– Мирзааҳмад ота каби фахрийларнинг ҳаёти ва фаолияти ёшлар учун чинакам ибрат мактабидир, – дейди подполковник Б. Мамажонов.

 Биз билан суҳбатда Мирзааҳмад ота «Қалқон» журналида чоп этилган бир суратни кўрсатди.

– Бу суратга уруш қатнашчиси, сўхлик ҳамкасбим Метинбой Болтаев билан бирга 2010 йили Тошкент шаҳрида ўтказилган Хотира ва қадрлаш куни байрами пайтида тушганмиз, – дейди у журнал муқовасига ишора қилиб. – Умр кўз очиб юмгунча ўтиб кетаверар экан. Афсуски, ўшанда кўришган, ҳамсуҳбат бўлган ҳамкасбларимнинг кўпи бугун орамизда йўқ. Шунинг учун бир-бирингизни қадрланг, қўлингиздан келганича яхшилик қилишга интилинг.

Абдувосит СИДИҚОВ,

«Постда» мухбири.

Фарғона вилояти.