Лейтенант Шерзод Саидмуродов Сардоба туманида туғилган. Касб-ҳунар коллежини тугатгач, 2017 йилда ИИВ Академиясига ўқишга қабул қилинди. 2020 йилдан Сирдарё вилояти ИИБ Янгиэр шаҳар ИИБ ХПБ катта инспектори вазифасига тайинланди.
Шерзод Саидмуродов ушбу вазифада хизмат қилар экан шаҳардаги барча профилактика инспекторларининг фаолиятини мувофиқлаштириш, олиб борилаётган профилактик, тезкор-қидирув ишларини умумлаштириш, таҳлил қилиш борасида алоҳида ўрнак кўрсатиб келмоқда. Айниқса, унинг вазиятни тезкорлик билан таҳлил қила олиши ҳуқуқбазарликларнинг олдини олиш, жиноятларни тезкорлик билан очилишида қўл келмоқда. Унинг саъй-ҳаракати билан шаҳардаги ўнга яқин жиноят иссиқ изидан очилишига эришилди.
Бунда у томонидан ҳудудлардаги криминоген вазиятнинг олдиндан таҳлил қилиниши, нотинч оилалар мониторинги олиш борилиши, профилактик ҳисобда турган шахслар билан ишлаш тизими самарадорлигининг оширилиши, жиноятга мойил шахслар билан ишлаш тизими йўлга қўйилганлиги алоҳида аҳамиятга эга бўлди. Айниқса, ўғирлик, фирибгарлик жиноятларининг очилишида ушбу тажриба қўл келмоқда. Маҳаллалар, аҳоли гавжум жойларга видеокузатув мосламаларининг ўрнатилишида ҳам алоҳида ташаббус кўрсатди.
Короновирус пандемияси шароитида эпидемия занжирини узиш мақсадида локдоун жорий этилиши, карантин қоидаларига қатъий риоя этилишини таъминлашга катта ҳисса қўшди. Ижтимоий объэктлар, тўйхона, кафе ва ресторанларда карантин қоидалари ўрнатилишига масъул этиб тайинланиб, кеча-ю-кундуз фаолият юритди. Айниқса, таълим даргоҳларида ижтимоий масофани сақлаш, болажонларнинг соғлигини сақлашга катта эътибор қаратди. Шу сабабли, Янгиэр шаҳридаги ўндан ортиқ умумтаълим мактаби ўқувчилари ўртасида касалликка чалиниш ҳолати аниқланмади.
Абдураҳмон МУСТАФОҚУЛОВ,
“Постда” мухбири.
Сирдарё вилояти.