(29 мартдан 4 апрелгача)
Қўй. Ички сезиш қобилиятингизга қулоқ тутинг, у асло панд бермайди. Бу ҳафта сиз учун ёқимли лаҳзаларга бой бўлади. Яқинларингиздан сафар таклифи ёки кутилмаган совға олишингиз мумкин. Уларга эътибор ва ғамхўрлик билан жавоб қайтаринг. Дам олиш кунларини саломатликни мустаҳкамлашга, ташқи кўринишни яхшилашга ва мириқиб ҳордиқ чиқаришга бағишланг.
Бузоқ. Ҳеч кутмаган жойингиздан пул маблағи келиб тушиши мумкин. Уни оқилона сарфлашга ҳаракат қилинг. Асосийси, масъулияциз инсонларга қарз берманг. Иш фаолиятингизга жиддий эътибор қаратинг. Сўнгги пайтларда йиғилиб қолган ҳужжатларни тартибга келтириб, ўз ўрнига саралаб чиқинг. Ҳамма вақт ҳушёр ва зийрак бўлинг, ҳамкасбларга кўнгилдаги сирларни очишга шошилманг.
Эгизаклар. Атрофингиздаги баъзи одамлар билан муносабатда муаммолар юзага келиши мумкин. Ҳеч кимга ишонманг, яхшиси «ҳимоя зирхини» асло ечманг. Катта аҳамиятга эга бўлган жиддий лойиҳаларга ҳозирча қўл урмаганингиз маъқул. Аммо уй ишлари ва ташвишларини ҳал этишни асло ортга сурманг. Бу ҳафта хонадонингизда енгил таъмир ёки катта тозалаш ишларини амалга ошириш учун қулай давр.
Қисқичбақа. Майда-чуйда масалалар аслида у қадар арзимас эмаслиги маълум бўлади. Дўстлар билан келишмовчиликлар келиб чиқиши мумкин, бироқ ҳақиқат сиз тарафда бўлади. Ушбу ҳафта жисмоний меҳнат билан шуғулланиш ва парҳез сақлаш учун мақбул давр ҳисобланади. Бунда сиздан ортиқча саъй-ҳаракат талаб этилмайди, лекин натижа кутилганидан ҳам аъло бўлиши эҳтимоли юқори.
Арслон. Молиявий маблағ сарфларини яқинларингиз билан обдон маслаҳат қилган ҳолда амалга оширинг. Лекин шахсий ҳаётга боғлиқ қарорларни мустақил қабул қилишга ҳаракат қилинг. Сокинлик ва ҳотиржамлик зарурми? Бу ҳафта вақтинча ишни ва оилавий ташвишларни бир четга суриб, ўз қизиқиш ва севимли машғулотларингиз учун вақт ажратинг.
Паризод. Бу даврда фақат ўзингиз учун мақбул ва ёқимли бўлган ишлар билан шуғулланиб, қолганини кейинги ҳафта режасига киритинг. Фаолият юритаётган жойингизда иш юкламасини орттиришлари мумкин. Касбий мажбуриятларингиздан ташқари бўлган ишлар сиз учун ортиқча эканини атрофдагиларга ҳис эттиринг. Ўз фикрингизни билдиришдан чўчиманг.
Тарози. Ишхонада сиздан камчилик топишга уринишлари мумкин, бироқ меҳнацеварлик ортидан раҳбарият ва ҳамкасбларнинг фикрини ўзгартиришингиз мумкин. Бу ҳафта оила аъзолари, айниқса, фарзандларга нисбатан қаттиққўл бўлиш талаб этилади. Бироқ уларнинг кўнглини оғритиб қўйишдан қочинг, юзма-юз олиб борилган суҳбат ва тушунтириш ишларининг ўзи кифоя.
Чаён. Бу даврдаги ҳар қандай янги танишувлар фойда ва омад олиб келади. Атрофдагилар билан кўпроқ муносабатда бўлишга ҳаракат қилинг, фақат шу йўл билан бу ҳафтада кузатилиши мумкин бўлган кўнгил ғашлигидан қутулиш имконига эга бўласиз. Агар уй учун бирон нарса харид қилиш ниятида бўлсангиз, яхшиси бу ишни ҳафтанинг сўнгги кунларида амалга оширган маъқул.
Ўқотар. Сиз учун ҳам руҳан, ҳам жисмонан енгиллашиш вақти етди. Сокинликда ёки табиат қўйнида кўпроқ дам олишга эътибор қаратинг. Бироқ ҳордиқ учун ортиқча сарф-ҳаражатга берилиб кетманг, чунки бу даврда молиявий жиҳатдан бироз қийинчилик юзага келиши мумкин. Ҳафта давомида зиддиятларнинг олдини олишга, ён-атрофдагилар билан хушмуомала бўлиб, улар билан асло баҳслашмасликка ҳаракат қилинг.
Тоғ эчкиси. Кўпдан бери орзиқиб кутилган имкониятни қўлдан бой бермаслик учун диққатли ва сергак бўлинг. Чигал ва ҳал этиб бўлмайдиган масалалар ҳеч бир қийинчиликсиз ўз ечимини топади. Бу даврда молиявий жабҳада тежамкор бўлиб, ортиқча харидлардан ўзингизни тийишга ҳаракат қилинг. Ишдан бўш вақтни имкон қадар кўпроқ сайр қилиб, тоза ҳаводан нафас олишга бағишланг.
Қовға. Ҳар қандай ишда тўғаноқ ва тўсиқларга учрашингиз мумкин. Кутилмаган натижаларга тайёр туринг ва зарурат туғилганда ёрдам сўрашдан чекинманг. Атрофдагиларга нисбатан ва янги дўст танлашда эҳтиёткор бўлинг. Фақат шундагина ишдаги кўпгина масалаларнинг ҳал этилиши муваффақиятли кечади. Бўш вақтингизни севимли ва қадрли инсонлар даврасида ўтказишга ҳаракат қилинг.
Балиқ. Ҳафта боши фаол ва қатъий ҳаракатларни талаб этади. Иш жойингизда сизни ютуқлар кутмоқда. Кўп вақтингизни олган лойиҳа, ваниҳоят, муваффақият қозонади. Ҳамкасблар билан муносабатлар янада мустаҳкамланади Бу даврда оилавий масалаларни ҳал этиш учун ҳам имконият туғилади. Дам олиш кунлари сизга яхши кайфият хамроҳ бўлади.