Онанинг дил изҳори

Ушбу суратга тушганимизга ҳам 8 йил бўлибди. Ўғлим Одилжон Солиев ҳозирги кунда ИИВ Халқаро аэропортларда хавфсизликни таъминлаш қўшинларига қарашли 7254-ҳарбий қисм махсус вазифаларни бажарувчи сафарбар взводи ҳарбий хизматчиси лавозимида хизмат қиляпти, унвони кичик сержант.

Ўтган йиллар давомида ўғлим кўплаб ютуқларга эришди. Оила қурди, спортнинг «Комбат айкидо» тури бўйича Наманган вилояти биринчилигида 1-ўрин, Осиё чемпионатида эса 2-ўринни қўлга киритди. Интенсив синовлардан муваффақиятли ўтгани учун «Довюрак жангчи» фарқловчи нишонига сазовор бўлди, шунингдек, «Алвон берет» соҳибига айланди. Бундан ташқари, ИИВ миқёсида ўтказилган жамоавий ўқ отиш мусобақаларида ҳам фаол қатнашиб, фахрий ёрлиқлар билан тақдирланди. Мен учун яна бир қувонарлиси, у ҳозир Наманган шаҳридаги олий ўқув юртида ахборот технологиялари йўналиши бўйича таҳсил оляпти.

Умрни оқар дарёга қиёслашганда кўпинча бу ўхшатиш қай даражада тўғри экани ҳақида ўйлаймиз. Кечагина атак-чечак қилиб қилиб юришни бошлаган пола­понимнинг бугунга келиб Ватан ҳимоячиси деган шарафли номга сазовор бўлиши қалбимга қанчалик ғурур бахш этишини сўзда ифодалашим қийин.

Кўча-кўйда болаларнинг шодликдан қийқириб юрганини кўриб, тинчликнинг нақадар азиз неъмат эканини яна бир карра хаёлимдан ўтказаман. Дунёнинг кўплаб давлатларида улғаяётган ўсмирлар болаликнинг нима эканини ҳатто англамай катта бўлаётгани бизни ҳушёрликка, тинчликнинг қадрига етишимизга ундаши зарур.

Ватан ҳимоячилари куни муносабати билан тинчлик-осойишталикни асраш йўлида хизмат қилаётган жасур ўғлонларимизни, барчинсифат қизларимизни оналик меҳрим билан табриклайман. Улар билсинки, дастур­хон бошида тинчлик учун қилинган дуоларда уларнинг номлари ҳам жаранглайди...

Она сифатида юртимиз сарҳадларини ҳимоя қилиш, халқимиз тинчлик-осо­йишталигини асраш йўлида фидойилик билан хизмат қилаётган довюрак фарзандларимизнинг эртанги куни бугунидан ҳам фаровон, ҳаётлари булоқ сувидек покиза бўлишига ишонаман.

Байрамингиз муборак бўлсин, азиз фарзандларим, Ватанимиз посбонлари!

Иҳтибархон ТОПИЛДИЕВА.

Наманган вилояти.