Спортга қадам қўйган ҳар бир ёш йигит-қизнинг бир орзуси бор: у ҳам бўлса чемпион бўлиш, жаҳон ареналарида ватанимиз байроғини юксакларга кўтариш.
Азизбек орзусига етишиш учун тинмай ҳаракат қилмоқда. Бугунги кунда Ички ишлар вазирлигининг 1-сонли Тошкент академик лицейнинг 2-босқичда таҳсил олаётган Азизбек Баҳодиров 2–6-октабр кунлари Тошкент шаҳрида спортнинг муай-тай тури бўйича «Ўзбекистон кубоги» учун курашилган мусобақада 67 кг вазн тоифасида фахрли 2-ўринни қўлга киритди.
Азизбек Баҳодиров 2007-йилнинг 14-май куни Тошкент шаҳрида туғилган. У ёшлигидан муай-тай спорт тўгарагига мунтазам қатнашиб келмоқда. Осиё чемпиони.
Азизбек айни дамда лицейда қунт билан билим олиш билан бирга тажрибали мураббийлари кўмагида спортда, ўқишида олий ўқув юртига кириш учун тинмай ҳаракат қилмоқда.
Унинг орзулари бисёр. Келажакда жаҳон чемпионатида олтин медалга эга бўлиш, шунингдек, ИИВ Академиясида ўқишни давом эттириш.
Шуни алоҳида таъкидлаш лозимки, лицей ўқувчилари орасида ёш иқтидорли спортчилар сафи йил сайин кенгайиб бормоқда. Томирида буюк аждодлар қони жўш ураётган Азизбек каби спортга ихлосманд довюрак ёшларимизнинг бунданда юксак марраларни эгаллашига, албатта, ишонамиз.
Мадина ҚАҲҲОРОВА,
ўз мухбиримиз.
Тошкент шаҳри.