...ғам-ғусса ва дард-алам шунчаки ўз шахсий ҳақиқатимга қарши яшаётганим тўғрисидаги огоҳлантирувчи сигнал эканини тушундим. Бугун унинг «Ўзликни англаш» деб номланишини биламан.

...ҳали вақти етиб келмаганида ва инсон ҳали тайёр бўлмаганида уни ўз истакларимни бажаришга мажбурлаш, ва айниқса, бу инсон ўзим бўлсам, кўнгилни қаттиқ ранжитишини тушундим. Бугун мен буни «Ўзини ҳурмат қилиш» деб атайман.

...бошқа ҳаётни орзу қилмай қўйдим ва шу ондаёқ атрофимни қуршаб олган ҳаёт менга ўсиш учун барча имкониятларни тақдим этаётганини кўрдим. Бугун мен бу ҳолатни «Этуклик» дейман.

...ҳар қандай вазиятда тўғри жойда ва тўғри вақтда бўлишимни, ҳаммаси тамомила тўғри онда юз беришини англадим. Бу борада ҳамма вақт хотиржам бўлишим мумкин. Эндиликда буни «Ўзига ишонч» деб қабул қиламан.

...ўз вақтимни ўғирлашни бас қилдим ва истиқболдаги катта лойиҳалар ҳақида орзу қилишни бошладим. Бугун фақат кўнглимга ва руҳимга қувонч бахш этадиган, мени бахтли қилиб, табассум улашадиган ишларни амалга ошираман. Мен буни ўзим истаганимдек ва ўз суръатимда рўёбга чиқараман. Бугун уни «Оддийлик» деб атайман.

...саломатлигимга зарар етказувчи озиқ-овқат, инсонлар, буюмлар ва вазиятлардан, мени «пастга» тортиб, ўз йўлимдан оғишга бошловчи омиллардан воз кечдим ва буни «Ўзимга бўлган муҳаббат» деб номладим.

...ҳамиша ҳақ бўлишни бас қилдим ва айнан ўша ондан тобора камроқ адаша бошладим. Бугун эса бу «Камтарлик» эканини тушундим.

...ўтмиш билан яшашни ва келажак учун хавотирланишни бас қилдим. Бугун мен ҳозирги он билан яшайман ва буни «Мамнунлик» деб атайман. 

...ақлим баъзан менга халақит қилишини, у сабабли ҳатто хасталанишим мумкинлигини англаб етдим. Аммо ақл-идрокимни қалбим билан боғлаганим заҳоти у менинг қимматли иттифоқчимга айланди. Бугун мен буни «Доно қалб заковати» деб тушунаман. 

Биз ҳеч қачон ўзимиз ва бошқа инсонлар билан баҳс бойлашишдан, қаршилик кўрсатишдан, муаммолар юзага келишидан чўчимаслигимиз, аксинча, тўғри йўл орқали уларни бартараф этишга ҳаракат қилишимиз лозим. Чунки ҳатто юлдузлар ҳам бир-бири билан тўқнашади ва бунинг натижасида янги оламлар юзага келади. Бугун мен буни «Ҳаёт» деб атайман. 

Гулчеҳра АЗИМОВА тайёрлади.